Filmi i vitit 1994 i Quentin Tarantinos, “Pulp Fiction” mund të konsiderohet si një film ikonik, por Uma Thurman nuk e kishte idenë se sa ndikues do të ishte. Filmi legjendar i regjisorit 62-vjeçar tregon historitë paralele të dy vrasësve me pagesë me protagonistë Samuel L. Jackson dhe John Travolta dhe se si ata janë të lidhur me figura të ndryshme në botën e krimit të Los Angeles.
Aktorja 55-vjeçare luajti Mia Wallace, gruan misterioze të një gangsteri, në një kast që përfshinte edhe Bruce Willis, Tim Roth, Christopher Walken dhe Harvey Keitel. Filmi u nominua për 7 çmime Oscar, duke fituar në fund për Skenarin më të Mirë Origjinal.
Në një intervistë të kohëve të fundit me gazetën britanike “The Times”, aktorja e nominuar për çmimin Oscar foli për karrierën e saj që tashmë përfshin 4 dekada duke u ndalur edhe te filmi legjendar i Quentin Tarantino. “E dija që ishte diçka e veçantë, mund ta kuptoje nga skenari, nga veçantia. Por ishte një film relativisht i vogël", - tha ajo.
Kur filmi u shfaq premierë në Kanë dhe fitoi Palmën e Artë, Thurman kishte 10 vjet që aktronte. Megjithatë, Thurman nuk ishte zgjedhja e parë e Miramax për rolin, pasi po merreshin në konsideratë edhe Michelle Pfeiffer, Meg Ryan, Holly Hunter dhe Rosanna Arquette.
Siç i kishte thënë më parë Vanity Fair, fillimisht ngurroi ta pranonte rolin. “Tarantino nuk ishte autori i respektuar, pothuajse mitik që është sot”, - tha ajo. Ajo sapo kishte përjetuar një dështim profesional në arkëtime me filmin “Eve Cowgirls Get the Blues” dhe ngurroi për shkak të natyrës “vulgare” të filmit. “Nuk isha e sigurt nëse doja ta bëja, sepse kisha disa probleme. Askush nuk mund ta besonte se ngurrova sadopak. As unë, kur e mendoj tani ”, - shtoi ajo. ©LAPSI.al
