Mediat izraelite i kanë kushtuar vëmendje humbjes së jetës së kapitenit të anijes turistike Arben Anamali në Liqenin e Shkodrës. Ai humbi jetën pasi u fut në ujë dhe shpëtoi dy turistë izraelitë që po shoqëronte me anijen e tij. “Jerusalem Post” shkruan se kapiteni i kishte paralajmëruar turistët të mos hynin në ujë pasi ishte e rrezikshme për shkak të rrymave, por ata e neglizhuan.
“Anamali, kapiteni i një anijeje turistike që operonte nga qyteti verior i Shkodrës, çoi një grup turistësh në Liqenin e Shkodrës në fillim të kësaj jave, përfshirë 7 qytetarë izraelitë. Duke injoruar paralajmërimet e tij për rryma të forta, dy nga izraelitët u hodhën në ujë, duke e gjetur shpejt veten në rrezik mbytjeje.
Jelekët e shpëtimit, përfshirë edhe atë të Anamalit që iu hodhën të dyve nuk patën sukses. Në një përpjekje për t'i afruar ata më pranë varkës, Anamali u hodh vetë në ujë. Ai ia doli t'i ndihmonte izraelitët të ktheheshin në anije përpara se të zhdukej vetë nën ujë. Pas pothuajse 48 orësh kërkimi, trupi i Anamalit u gjet.
Besohet se Anamali u shemb për shkak të arrestit kardiak si pasojë e lodhjes fizike dhe sforcimit ekstrem pas shpëtimit. Trupi i tij u transferua në spitalin rajonal të Shkodrës për ekzaminime të mëtejshme. Anamali lë pas dy fëmijë.
Ai është nderuar pas vdekjes nga qeveria shqiptare si "Dëshmor i ardheut", një nga nderimet më të larta të Shqipërisë për ata që humbasin jetën gjatë akteve të trimërisë. Një ceremoni zyrtare përkujtimore pritet të mbahet në ditët në vijim” – shkruan “Jerusalem Post”. /LAPSI.al
