Një ngjarje e rëndë është regjistruar në fshatin Theth të Shkodrës, ku ndërhyrja në kohë e Policisë ka parandaluar përshkallëzimin e një konflikti mes disa shtetasve.
Sipas njoftimit zyrtar, 33-vjeçari Alfred Rrupa është arrestuar pasi ka qëlluar me armë zjarri në drejtim të një automjeti me të cilin po udhëtonin tre shtetas – N. H., 29 vjeç, P. H., 27 vjeç dhe D. Rr., 29 vjeç – të gjithë banues në Theth. Për fat të mirë, nga të shtënat nuk ka pasur të lënduar, por vetëm dëme materiale në mjetin e qëlluar.
Pas incidentit, tre personat e mësipërm dyshohet se kanë ushtruar dhunë fizike ndaj 33-vjeçarit, për çka janë proceduar penalisht në gjendje të lirë.
Gjatë veprimeve hetimore është sekuestruar edhe arma e përdorur në konflikt – një pistoletë me municion luftarak.
