Një sasi tritoli ka shpërthyer gjatë natës në lagjen “Partizani” në qytetin e Elbasani.
Lënda plasëse është vënë në katin e parë të një pallati, ndërsa si pasojë e shpërthimit nuk ka pasur të lënduar, por vetëm dëme materiale.
Banorët e zonës thonë se kanë dëgjuar një shpërthim të fuqishëm. Sipas tyre, në banesë, e cila ishte objekt i sulmit jeton një familje e përbërë nga tre anëtarë. Në momentin e shpërthimit ata nuk ndodheshin në banesë.
“23:15 ka qenë ora, as kur ka rënë tërmet nuk është tundur shtëpia ime ashtu. Aq u trembën sa nuk ka ku shkon”, shprehet një dëshmitare për korrespondenten e Top Channel, Bruna Kërçyku.
Lënda plasëse ishte vendosur në oborrin e pallatit afër hyrjes së një apartamenti. Ende nuk dihen shkaqet, ndëkrohë që po punohet për të zbardhur dinamikën e ngjarjes dhe po hetohet nga policia dhe prokuroria, e cila ka mbledhur prova të shumta për identifikimin e organizatorit të ngjarjes.
