Pas matjeve në muajin Shkurt dhe Mars, Barometri Euronews Albania ka zhvilluar matjen e tretë zgjedhore për Qarkun e Tiranës në muajin Prill. Metodologjia e përdorur është sërish si në matjet e mëparshme kampion rastësor i shtresëzuar (referuar njësive administrative) dhe madhësia e kampionit ka qënë 1000 qytetarë të pyetur në gjithë territorin e Qarkut Tiranë, ballë për ballë. Periudha kohore e mbledhjes së të dhënave për matjen e tretë zgjedhore të Barometrit Euronews Albania në Qarkun e Tiranës është 11 Prill – 22 Prill 2025 dhe marzhi gabimit është +/-3.1%.
Matja e tretë politike për Qarkun e Tiranës na tregon se si ka ndryshuar mendimi i qytetarëve dhe preferencat e tyre për politikanin që është më i përshtatshëm për të qenë Kryeministër dhe partinë më të përshtatshme për të qeverisur vendin.
Në këto matje Edi Ramën e shohin të përshtatshëm për Kryeministër 40.1% e të pyeturve, ndërsa Partinë Socialiste si më të përshtatshme për të qeverisur 41.8 %.
Sali Berishën e shohin të përshtatshëm për Kryeministër 23 % e të pyeturve, ndërsa Aleancën për Shqipërinë Madhështore e shohin si koalicion të përshtatshëm për të qeverisur 24.3 % e të pyeturve.
Agron Shehajn e shohin si kryeministër 9.2 % e të pyeturve, ndërsa partine e tij Mundësia 9.1 % e të pyeturve e shohin si të përshtatshme për të qeverisur vendin.
Adriatik Lapajn e preferojnë për Kryeministër 6.7 % e të pyeturve ,koalicionin Nisma Shqipëria Bëhet ndërkohë e shohin si të përshtatshme për të qeverisur 6.4 %.
Arlind Qorin 3.3 % e të intervistuarve në nivel qarku e shohin si të përshtatshëm për Kryeministër dhe Lëvizjen Bashkë të drejtuar prej tij 3.6 % e të pyeturve e shohin si parti të përshtatshme për të qeverisur.
Lulzim Bashën 1.2 % e të pyeturve e shohin si kryeministër.
Matja e tretë e Barometrit për Qarkun e Tiranës e realizuar nga data 11 deri në 22 Prill tregon një trend të ndryshëm nga matjet kombëtare për pëlqyeshmërinë e liderëve politikë.
Edi Rama në Tiranë ka pëlqyeshmërinë 45 %, ndërsa në nivel kombëtar e kishte 49.4 %. Sali Berisha në Tiranë ka 30.2 % pëlqyeshmëri ndërsa në nivel kombëtar ishte 33.5 %. Agron Shehaj në Tiranë është 27.3% në pëlqyeshmëri ndërkohë që në nivel kombëtar ishte 37.3%.
Adriatik Lapaj ka 25% pëlqyeshmëri në Tiranë, ishte 35.1% pëlqyeshmëria e tij në nivel kombëtar. Arlind Qori 23.5% në Tiranë ishte 24 % në nivel kombëtar. Dashamir Shehi është në Tiranë 19.4% në pëlqyeshmëri, ishte 23.1 % në nivel kombëtar. Elena Kocaqi është 10.8 % pëlqyeshmëri në Tiranë ishte 14.9 % në nivel kombëtar.
Tom Doshi në Tiranë e ka mendimin pozitiv 8.7 %, e kishte 20.2 % në nivel kombëtar. Basha 8.2 % pëlqyeshmëri në Tiranë, ishte në nivel kombëtar 9.7 %. Kreshnik Osmani 4.5 % në Tiranë mendimin pozitiv, 5.4 % në nivel kombëtar. Edmond Stojku 3.3 % mendim pozitiv në Tiranë, ishte 4.5 % në nivel kombëtar.
Edhe nëse krahasojmë pëlqyeshmërinë brenda qarkut në 3 matje radhazi, duket qartë që Edi Rama ka rënë në matjen e fundit në pëlqyeshmëri ( 50.3 % Shkurti /50.4% Marsi/45 % Prilli)
Berisha po ashtu ka rënie në pëlqyeshmëri ( 28.2% Shkurt /31.9% Marsi /30.2 % Prilli) Shehaj ka rënë po ashtu në matjen e tretë në pëlqyeshmëri në Tiranë ( 29.9% Shkurt/31.7 % Mars /27.3 % Prill)
Lapaj po ashtu si liderët e mësipërm bie në pëlqyeshmëri në Tiranë në matjen e tretë ( 29.3 % Shkurt/29.7 % Mars /25 % Prill) Arlind Qori bie në pëlqyeshmëri në Tiranë në matjen e tretë ( 25.2 % Shkurt /27.6 % Mars /23.5 % Prill) Basha bie po ashtu në pëlqyeshmëri nga matja e dytë në të tretën në nivelet si në vijim (12.7% Shkurt /10% Mars /8.2 % Prill)
Një nga argumentet kryesor të debatit publik nisur nga narrativa politike e fushatës së Edi Ramës ka qenë diskursi me bazë gjinore. Qasja e tij në mbështetje të grave merr një konfirmim nga analiza e shifrave edhe në matjen e tretë të Barometrit për Qarkun e Tiranës.
Në matjen e pëlqyeshmërisë së tij në këtë qark për herë të tretë, rezulton se shumica e atyre që e pëlqejnë Ramën apo kanë mendim pozitiv për të janë gra, në shifra rezultojnë 8.1 % më shumë se burrat (40.8 % burra /48.9 % gra )
Në pyetjen për kandidatin e preferuar për Kryeministër konfirmohet po ashtu e njëjta gjë epërsia e grave që e zgjedhin si kandidat për Kryeministër Edi Ramën. Ato janë 8% më shumë se burrat (35.9 % burra /43.9% gra )
Edhe në zgjedhjen e PS si partia e duhur për të qeverisur vendin rate janë në shumicë në Qarkun e Tiranës, 9.1 % më shumë se burrat ( 37% burra /46.1 % gra )
Në parashikimin e zgjedhjeve për 11 Majin në matjen e Qarkut të Tiranës konfirmohet e njëjta dukuri për Partinë Socialiste. Shumica e atyre që parashikojnë fitoren e PS në 11 Maj janë gra, 4.1 % më shumë sesa burrat (48.9 % burra / 53% gra). /Euronews Albania
