Pas arrestimit të shefit të qarkullimit rrugor, Roven Zeka, SPAK ka sekuestruar pamjet e kamerave të sigurisë në ambientet e izolimit, për shkak të dyshimeve se zyrtarë të tjerë të policisë kanë hyrë në kontakt me të gjatë qëndrimit në qeli.
Mes personave që kanë pasur kontakte me Zekën janë një drejtor policie dhe tre shefa komisariatesh — veprim që përbën shkelje të ligjit, pasi Zeka është nën hetim për korrupsion dhe nuk lejohet komunikimi me persona të jashtëm pa autorizim të posaçëm.
Për të njëjtën çështje, hetuesit kanë sekuestruar edhe telefonin celular të një biznesmeni, që dyshohet se ka pasur lidhje me rastin që ka çuar në arrestimin e Zekës.
Sekuestrimi i provave synon të verifikojë nëse ka pasur tentativa për të ndikuar apo penguar hetimin e SPAK ndaj shefit të Rrugores.
