Gerard Piqué dhe e dashura e tij prej tre vitesh, Clara Chía, thuhet se janë ndarë.
Gerard, i cili u tërhoq nga futbolli në vitin 2022, ka qenë shpesh në qendër të vëmendjes për jetën e tij personale, veçanërisht pas marrëdhënies 11-vjeçare me këngëtaren kolumbiane Shakira, me të cilën ka dy djem, Milan dhe Sasha.
Sipas emisionit spanjoll “Vamos a ver” , raportuar nga “Marca”, gazetarja Adriana Dorronsoro konfirmoi se Piqué dhe Chía janë ndarë.
Ajo tha se shkaku i ndarjes nuk është ende i qartë, por ka dëgjuar se mund të jenë përfshirë palë të treta.
Dorronsoro tha: “Kam konfirmim që Gerard Piqué dhe Clara Chía janë ndarë dhe po hetoj pak mbi arsyet, sepse po dëgjoj për palë të treta, edhe pse ende nuk është shumë e qartë.”
Ajo shtoi se burimi i informacionit ishte shumë afër çiftit dhe nuk konfirmoi nëse arsyeja është fakti që Piqué është parë kohët e fundit në Miami me një grua flokëkuqe.
Clara Chía punon për një kompani prodhimi në fushën e argëtimit sportiv dhe çifti kishte publikuar më parë shumë foto së bashku në rrjete sociale.
Piqué e ndan jetën mes Barcelonës dhe Miamit, ku jetojnë fëmijët e tij, dhe raportet në shtypin spanjoll sugjerojnë se kjo "jetë e dyfishtë" ka qenë një pikë tensioni në marrëdhënien e tyre.
Në qershor të vitit 2022, pas thashethemeve për tradhti, Shakira njoftoi ndarjen me të pas 11 vite bashkëjetesë.
Më pas, në këngët e saj, ajo e ka përmendur shpesh me tone thumbuese, duke e quajtur madje “Voldemort”.
Në një intervistë për CNN, Piqué tha: “E vërteta ose ajo që ndodh, nuk tregohet gjithmonë ashtu siç është. Nuk mund ta kontrolloj këtë... Jam i lumtur, po kaloj mirë dhe ndihem me fat.”/Lapsi.al
