Pedro Pascal kritikoi ashpër shkrimtaren J.K. Rowling, duke e quajtur një “humbëse e neveritshme”, pasi ajo festoi vendimin e Gjykatës së Lartë të Mbretërisë së Bashkuar që deklaron se gratë trans nuk konsiderohen ligjërisht gra.
Aktori i njohur nga “The Last of Us” reagoi në Instagram nën një video të aktivistit social Tariq Ra’ouf, i cili e quajti reagimin e Rowling “si diçka që do ta bënte vetë Voldemort”. Pedro komentoi: “M** i neveritshëm është fiks termi i duhur. Sjellje prej HUMBËSE të pështirë.”
Në video, Ra’ouf denoncoi Rowling për atë që e quajti një fushatë të qëllimshme për të mbjellë urrejtje dhe frikë ndaj komunitetit trans, duke theksuar se ajo është “shumë krenare” për rolin e saj në këtë çështje dhe u bëri thirrje ndjekësve të bojkotojnë çdo gjë të lidhur me “Harry Potter”.
“E drejta për të qenë trans është e drejtë njerëzore. Gratë trans janë gra,” theksoi aktivisti, duke i kërkuar publikut të mos mbështesë financiarisht askënd që bashkëpunon me Rowling.”
Pedro Pascal, 50 vjeç, është një përkrahës i fortë i komunitetit LGBTQIA+, sidomos pas daljes publike si trans e motrës së tij, Lux Pascal, në vitin 2021.
Së fundmi, ai u shfaq me një bluzë me mbishkrimin “Protect the Dolls” në premierën e filmit “Thunderbolts” në Londër – një mesazh solidariteti me gratë trans, ku “dolls” është një term i dashur brenda komunitetit LGBTQIA+.
Nga ana tjetër, Rowling festoi vendimin e gjykatës duke shkruar në X (ish-Twitter): “Mendoj se do të ndez një puro më vonë”, duke e cilësuar vendimin si mbrojtje e të drejtave të grave dhe personave homoseksualë.
Ajo ka qenë prej vitesh në qendër të kritikave për qëndrimet e saj kundër personave trans, duke deklaruar madje se “me kënaqësi do të shkonte në burg për këto bindje”.
