Arkitektja Bianca Censori, bashkëshortja e reperit Kanye West, duket se nuk ka ndërmend të ndalet me paraqitjet e saj provokuese që prej martesës me artistin. Këtë herë, 30-vjeçarja është fotografuar në Mallorca të Spanjës, duke zbritur nga një makinë luksoze me një veshje që s’kishte si të kalonte pa u vënë re: vetëm një body i ngushtë dhe geta të zeza, të kombinuara me çizme me taka të larta.
Kjo dalje vjen pas një serie paraqitjesh të guximshme që kanë bërë jehonë në media. Në fillim të shkurtit, Bianca bëri bujë në tapetin e kuq të Grammy Awards, ku u shfaq me një mini-fustan transparent, krah Kanye West, në një nga daljet e tyre më të komentuara.
Por ndryshe nga herët e tjera, këtë herë ajo është parë e vetme, pa reperin në krah, çka ka nxitur edhe më shumë spekulimet në rrjet. Komentet vijojnë të ndahen mes atyre që e shohin si një zgjedhje të saj personale dhe atyre që dyshojnë se Bianca është thjesht një “kukull” në duart e Kanye-t, e përdorur për të tërhequr vëmendjen me lëvizje të tilla.
Fotot e fundit, megjithatë, lënë të kuptohet se Censori ndoshta nuk ka nevojë për regjinë e Kanye West për të mbetur në qendër të vëmendjes, duke shtuar dyshimet se stili i saj i guximshëm mund të jetë më shumë sesa një skenar i dikujt tjetër.
