Albin Kurti synon ta sigurojë shumicën e nevojshme për të qëndruar më tej në krye të Qeverisë së Kosovës. Dhe këtë kërkon ta bëjë pas bisedimeve në dy javë. Kryeministri në detyrë i nisi zyrtarisht përpjekjet me opozitarët.
Në zyrën e tij në Qeveri, ai i nisi takimet me partitë politike të pakicave, për t’u konsultuar me përfaqësues të tyre lidhur me formimin e qeverisë së re të vendit.
Kryetari i Lëvizjes Vetëvendosje u takua me zëvendësen e tij në detyrë dhe kryetaren e Partisë së Re Demokratike (NDS) boshnjake, Emilija Rexhepi, e cila konfirmoi gatishmërinë e plotë për vazhdim të bashkëpunimit.
Kurti i vijoi takimet me partitë e pakicave duke e pritur në zyrën e tij në qeveri ministrin në detyrë për Komunitete dhe Kthim dhe kryetarin e Partisë për Liri, Drejtësi dhe Mbijetesë, Nenad Rashiq. Edhe ai përsëriti mbështetjen e tij ndaj kryeministrit Kurti për formimin e qeverisë së re dhe vazhdimit të bashkëpunimit të frytshëm edhe në mandatin e ardhshëm.
As dy javë të plota nuk kanë mbetur nga dita kur Kurti synon ta paraqesë para Kuvendit përbërjen e qeverisë së ardhshme dhe zgjedhjen e saj.
Seanca konstituive e Kuvendit do të mbahet më 15 prill, siç vendosi të martën presidentja Vjosa Osmani. Po atë ditë, LVV synon ta zgjedhë edhe qeverinë.
