Kreu i PD-së, Sali Berisha ka deklaruar nga Shkodra se, sipas tij, ka një dosje tmerrësisht të rëndë për kryebashkiakun Benet Beci.
Berisha deklaroi se kryeministri Edi Rama po e mban peng me këtë dosje kreun e Bashkisë Shkodër, të cilin e quajtir “Beci i Dobraçit”.
“Shpejt qytetarët e Shkodrës do marrin vesh se kush është ai që i qeveris aty, se çfarë përfaqëson bashkiaku i Dobraçit”, theksoi kryedemokrati.
Sali Berisha: Zoti Spahia na nderon në Shkodër. Dhe shpejt qytetarët e Shkodrës do marrin vesh se kush është ai që i qeveris aty, se çfarë përfaqëson bashkiaku i Dobraçit.
Do e mësojnë shumë shpejt. U jap fjalën se qytetarët e Shkodrës do mësojnë shumë shpejt se ç’përfaqëson Beci i Dobraçit. Kurse Bardh Spahia shkon në SPAK se ka zbatuar ligjin, ka mbrojtur kodin e një zyrtari, i cili nuk mund të pranojë delinkuentë në administratë.
Pra, ai proces na bën nder të gjithëve ne dhe i bën nder Shkodrës dhe çdo qytetari. Tani, e vërteta është që ka një dosje tmerrësisht të rëndë për Benet Becin, me të cilën e mban peng Edi Rama. Por ne jemi kundër politikës së pengjeve.
