Procedura e ndjekur nga punonjësit e AKU-së për të bërë analizat e mishit të futur në Shqipëri nga Brazili dhe që rezultoi me salmonelë janë duke u hetuar nga ana e Prokurorisë së Tiranës.
Kjo e fundit ka regjistruar procedim penal për dy vepra penale, atë të shpërdorimit të detyrës dhe importimi, prodhimi, shitja dhe ruajtja e ushqimeve të rrezikshme për shëndetin dhe jetën e njerëzve.
Në drejtim të dyshimeve se zyrtarë e AKU mund të kenë shpërdoruar detyrën, burimet i thanë Tv Klan se Prokuroria ka administruar dhe po kryen hetime për të parë nëse procedurat e kryerjes së analizave kanë qenë konform parashikimeve ligjore.
Kjo pasi nga momenti i futjes së ngarkesës prej 7.8 ton deri në kryerjen e analizave kishte kaluar 10 ditë, kohë gjatë të cilës u hodhën në treg 2.6 ton.
Mishi i pulës i kontaminuar me salmonelë përbën një kërcënim të drejtpërdrejtë për shëndetin.
Infeksioni i salmonelës mund të shkaktojë diarre të rëndë, ethe dhe dehidrim, simptoma që shfaqen brenda 8 deri në 72 orë pas konsumit të mishit të infektuar.
Vetëm gatimi në temperaturë mbi 70°C mund të eliminojë rrezikun.
