Ambasada Britanike organizoi një takim informues me Kryeprokurorin e Posaçëm Altin Dumani, Prokurorin e Përgjithshëm Olsian Çela dhe Komisionerin Shtetëror të Zgjedhjeve Ilirjan Celibashi, me qëllim prezantimin e strategjisë së re për hetimin dhe parandalimin e krimeve zgjedhore, e cila është publikuar në vitin 2025.
Gjatë këtij sesioni, përfaqësuesit e institucioneve ndanë qasjet individuale dhe kolektive në adresimin e shkeljeve zgjedhore, në një kontekst operativ sfidues për procesin zgjedhor. Strategjia e re përfshin masa për identifikimin dhe reduktimin e rreziqeve potenciale në prag të zgjedhjeve vendore të 11 majit.
Në fokus të diskutimeve ishte edhe marrëveshja e re institucionale mes Komisionit Qendror të Zgjedhjeve, Prokurorisë së Përgjithshme dhe SPAK-ut, e cila është mirëpritur nga komuniteti ndërkombëtar si një zhvillim i rëndësishëm që garanton ndarjen e qartë të përgjegjësive mes palëve.
Në fund të takimit, Ambasada Britanike rikonfirmoi mbështetjen për përpjekjet e Shqipërisë në garantimin e një procesi zgjedhor të drejtë, të ndershëm dhe transparent, duke theksuar rëndësinë e integritetit dhe sigurisë së votës për demokracinë.
Njoftimi i Ambasadës Britanike:
Ambasada Britanike ftoi Kryeprokurorin Special, Prokurorin e Përgjithshëm dhe Komisionerin Publik të Zgjedhjeve për të informuar ambasadorët mbi strategjinë për hetimin dhe parandalimin e krimeve zgjedhore, të publikuar në vitin 2025.
Sesioni informues mbuloi qasjet kolektive dhe individuale të institucioneve për hetimin e shkeljeve zgjedhore në mjedisin aktual operativ, duke përfshirë strategjinë për zbutjen e rreziqeve të mundshme në procesin e ardhshëm zgjedhor.
Marrëveshja e re ndërmjet institucioneve të Komisionit Qendror të Zgjedhjeve, Prokurorisë së Përgjithshme dhe Strukturës së Posaçme Kundër Korrupsionit dhe Krimit të Organizuar u mirëprit nga komuniteti ndërkombëtar si një hap i rëndësishëm i radhës në sigurimin e qartësisë së qëllimit për secilin institucion.
Ambasada Britanike mirëpret angazhimin e Shqipërisë për të siguruar që zgjedhjet e 11 majit të jenë transparente, të drejta dhe të sigurta.
