Kryetari i Partisë Demokratike, Sali Berisha tha në emisionin "Now" në Euronews Albania se Agron Shehajt i është bërë kërkesë që të jetë pjesë e koalicionit nën drejtimin e PD dhe ai e ka refuzuar. Berisha zbuloi se Shehajt i ishte ofruar që të kandidonte për bashkinë e Tiranës si dhe të merrte drejtimin politik të Tiranës gjatë fushatës, gjë që ai nuk e ka pranuar duke bërë zgjedhjen e tij.
“Agron Shehaj u shkëput në mënyrë të pashpjegueshme, por unë jam i mendimit që e drejta e zgjedhjes është e drejta themelore e njeriut. Shehaj mendoi se do ketë një të ardhme në politikë më të mirë jashtë PD, është e drejta e tij.
Atij ju ofrua oferta për koalicion me të vetmin qëllim që asnjë votë e elektoratit tonë të mos i mungojë PD në betejë me Ramën. Ai refuzoi. Pajtohet, në një farë mënyre kontribuon me këtë të keqe, ai merr vota si të dëmtojë frontin opozitar.
Agron Shehajt i janë bërë të gjitha ofertat. I është ofruar a dëshiron të kandidosh për bashkinë Tiranë? Jo tha, dua më shumë. Iu ofrua drejtimi politik i Tiranës gjatë fushatës. Unë respektoj çdo zgjedhje, por për mua vend më të përshtatshëm se këtu ku je nuk ka.
Ai bëri zgjidhjet e tij. I kam thënë mos u largo se vendi yt është këtu. I kam çuar fjalë pasi është krijuar koalicioni: "Urdhëro në koalicion", sikundër atyre të tjerëve, "Hajdeni të bashkohemi të heqim këtë, pastaj secili të marrë qëndrimet e tij".
E ka marrë Bylykbashi. I kam kërkuar të lidhet me të, i kam thënë "hajde urdhëro". Iku me një ide, por ideja e tij nuk mund të ishte kurrë që të dëmtojë PD se ky kod e dëmton”, - tha Berisha. /Euronews Albania
