Kryetari i Partisë Demokratike, Sali Berisha, ka sfiduar publikisht kryeministrin Edi Rama për një debat televiziv. Gjatë një deklarate për mediat nga selia blu, Berisha akuzoi Ramën se po shmang ballafaqimin me publikun dhe refuzon të përballet me kundërshtarët politikë për bilancin e 12 viteve në qeveri.
“Një njeri që ka qeverisur 12 vite, duhej të ishte 12 herë i gatshëm të dilte para qytetarëve. Por Rama është mbyllur, nuk flet me gazetarët, nuk pranon debat. Është kthyer në një kloun politik që fsheh dështimet pas monologëve dhe propagandës,” tha Berisha.
Ai ironizoi kryeministrin për marrëdhënien me Lulzim Bashën, duke e quajtur “Lali Luli” që sipas tij “ka zëvendësuar Lali Erin”, ndërsa akuzoi Ramën për manipulim të hapësirës mediatike dhe për shmangie të temave të rëndësishme elektorale.
“E ftoj në një debat të vetëm televiziv, qoftë edhe për një temë. Le të debatojmë për integrimin evropian. Ky është integrimi që u ofron shqiptarëve: të ikin nga vendi, ndërsa Shqipëria të mbetet protektorat krimi dhe droge.” u shpreh Berisha.
