E konsideruar gjerësisht në mediat ndërkombëtare si “Dasma e vitit”, çifti Anant Ambani dhe Radhika Merchant janë kurorëzuar këtë fundjavë. Dasma e djalit më të vogël të Mukesh Ambanit, një prej njerëzve më të pasur në botë do të zgjasë tre ditë, duke filluar nga 12 dhe duke përfunduar më 14 korrik. Ceremonia raportohet se ka kushtuar rreth 300 milionë euro, në të cilat megjithatë nuk përfshihet mikpritja e të famshmëve të shumtë që morën pjesë dhe dhuratat që çifti do t’u bëjë. Personalitete globale, manjatë dhe politikanë kanë zbarkuar në kryeqytetin financiar të Indisë.
Festimet madhështore të dasmës filluan me një ceremoni tradicionale hindu të premten, e ndjekur nga një pritje madhështore që do të zgjasë gjatë gjithë fundjavës. Lista e të ftuarve përfshin ish-kryeministrat britanikë Tony Blair dhe Boris Johnson, CEO i Saudi Aramco Amin Nasser, Adele, Lana Del Rey, Drake dhe David Beckham, sipas mediave lokale.
Në mars, ata organizuan një festë tre-ditore me 1200 të ftuar, duke përfshirë ish-liderë botërorë, manjatë të teknologjisë dhe paraqitje nga Rihanna dhe Akon. Në këtë event morën pjesë edhe miliarderët e teknologjisë Mark Zuckerberg dhe Bill Gates.
