Arrestohen tre persona dhe procedohen dy të tjerë në Elbasan për vepra të ndryshme penale. Mësohet se një 36-vjeçar është arrestuar në flagrancë pasi ka dhunuar motrën e tij.
Dy persona të tjerë janë arrestuar pasi janë kapur duke drejtuar automjetet në gjendje të dehur. Dy persona janë proceduar në gjendje të lirë për veprat penale trafikimi i automjetit dhe dhuna për motive të dobëta.
Njoftimi i Policisë:
Drejtoria Vendore e Policisë Elbasan
Komisariati i Policisë Gramsh arrestoi në flagrancë shtetasin E. S., 36 vjeç, banues në Gramsh, pasi ka ushtruar dhunë ndaj motrës së tij.
Sektori i Qarkullimit Rrugor arrestoi në flagrancë shtetasit:
-S. H., 35 vjeç, banues në Tiranë, pasi në aksin rrugor "Elbasan-Metalurgjik", u kap duke drejtuar automjetin, në gjendje të dehur;
-K. S., 36 vjeç, banues në Cërrik, pasi në aksin rrugor "Gramsh-Cërrik", automjeti që e drejtonte në gjendje të dehur, ka dalë nga rruga. Si pasojë janë shkaktuar vetëm dëme materiale.
Seksioni për Hetimin e Trafiqeve të Paligjshme dhe Narkotikëve referoi materialet në Prokurori ku nisi procedimi në gjendje të lirë për shtetasin F. K., 56 vjeç, banues në Elbasan, pasi dyshohet se ka trafikuar një automjet "Audi", i cili u sekuestrua në cilësinë e provës materiale.
Komisariati i Policisë Elbasan referoi materialet në Prokurori ku nisi procedimi në gjendje të lirë për një 14-vjeçar, pasi ka goditur me grushte një 17-vjeçar, për motive të dobëta.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
