Një ndeshje mund të fitohet edhe me një goditje në portë. Por probabiliteti thotë se sa më shumë tentativa aq më e madhe mundësia për të shënuar. E rrjedhimisht edhe për të fituar. Në këto javë të para të Superiores po dallohen shumë skuadrat që arrijnë të mbajnë topin më shumë në zonën kundërshtare. Këtë e reflekton Tirana, por edhe Egnatia. E njëjta gjë vlen edhe për ato që përpiqen të gjejnë golin me tentativa nga distanca. Kalimi i topit në zonën kundërshtare do të thotë gjithashtu krijimi i situatave më të rrezikshme për kundërshtarët. Edhe nëse nuk ka goditje drejt portës, është gjithnjë mundësia e ekspozimit ndaj penalltive ose situatave të favorshme.
Dy skuadrat kryeqytetase Partizani e Tirana janë ato që prekin më shumë topa në zonën kundërshtare gjatë një ndeshjeje. Të dhëna të shkëlqyera prodhojnë edhe Egnatia dhe Bylis. Kjo renditje mund të gjenerojë edhe analiza të tjera të tjera.
Renditja për numrin e topave të prekur në zonën kundërshtare dhe goditjet drejt portës kundërshtare janë shumë të ngjashme. Katër skuadrat e para janë të konfirmuara në krye të këtij klasifikimi specifik. Këto të dhëna, nga ana tjetër, ndryshojnë në llojin e goditjeve që prodhojnë skuadrat.
Tirana është skuadra që e dërgon topin më shpesh në zonën kundërshtare. Por bardheblutë janë edhe ata që zgjedhin të godasin më shumë herë nga jashtë zonës sipas përqindjes. Kombinimi i këtyre renditjeve shpjegon se sa janë në gjendje skuadrat të konkretizojnë me goditje në portë aksionet e lojës që arrijnë deri në zonën kundërshtare.
