"I kam luajtur të gjitha ndeshjet dhe e ndjej veten mirë. Unë do të bëj maksimumin në stërvitje, por është zgjedhja e trajnerit, se cili do të luajë". Taulant Seferi, sulmuesi me më shumë minuta i momentit ndër kuqezinjtë, është gati për Izraelin. I ardhur nga atmosfera e luftës në Ukrainë, për të nuk është problem të bëjë betejë edhe në Tel Aviv. "Izraeli është një kundërshtar i fortë dhe në fushën e tyre janë shumë agresivë. Ne do të punojmë këto gjashtë ditë që kemi para ndeshjes dhe do të shohim edhe pikat e dobëta të Izraelit dhe do të sulmojmë aty ku duhet".
Presioni është e qartë se rëndon mbi sulmuesit, që nuk është se kanë qenë kaq efikasë në dy daljet e para. "Pa dyshim se nëse duam të fitojmë ndeshjen, na duhen gola dhe jam shumë i lumtur që të gjithë sulmuesit janë në formë - tha Seferi, duke treguar disponibilitet -. "Ndihem mirë nëse luaj, nuk ka rëndësi se me kë. Është zgjedhje e trajnerit dhe ai vendos. Kush do të jetë në fushë duhet të bëjë maksimumin, pasi këto dy ndeshje janë finale për ne".
Finale që duhet ndarë në 180 minuta, njësoj të rëndësishme. Por, duhet fituar me cdo kusht e para, sepse pa të edhe Islanda humb kuptimin: "Fokusi ynë është te Izraeli, sepse është ndeshja e parë. Do ta përgatisim Izraelin maksimalisht dhe pastaj do flasim për ndeshjen e radhës".
Lexo më tej: “Dy ndeshje vendimtare”: Reja e pranon, por mesfushën e ka ‘jashtë përdorimit’
MUNGESAT
Dy sfidat vendimtare i gjejnë kuqezinjtë me shumë mungesa, dëmtime e probleme, por besimi për fitore ndihet në fjalët e Seferit: "Këto mungesa që kemi janë me vlerë të madhe, janë lojtarë shumë të mëdhenj dhe na mërzisin pak që nuk janë me ne. Por i uroj shërim të shpejtë dhe të kthehen sa më shpejt me ne. Ky grup që jemi duhet të bëjmë maksimumin dhe të përgatitemi maksimalisht për këto ndeshje sepse e dimë që janë vendimtare dhe na duhet maksimumi".
https://youtu.be/b0ioqLjCEUE
