Fitorja e dytë radhazi kundër skuadrave të fundit të renditjes, rinis Lacin drejt zonës së lartë të renditjes, pas një fillimi për harruar. 2-0 dorëzohet edhe Skënderbeu, në debutimin e teknikut Mirel Josa në pankinën kurbinase, që me një dygolësh të Guindos ndëshkon ish-skuadrën e tij me të cilën bëri epokë në histori.
Momenti më i keq për bardhezinjtë duket se kaloi dhe ajo e shfaqur me Josën ishte një skuadër me ekuilibër, e përqendruar dhe asnjëherë në vështirësi, që kërkoi e gjeti fitoren e dytë në shtatë javë kampionat, me Zarubicën, golashënuesin më të mirë me 4 gola në pankinë. E në fakt, loja e të dy skuadrave pati ngërçe dhe rastet munguan, por në 15 minutat e fundit të pjesës së parë bardhezinjtë bënë diferencën me penalltinë e fituar nga Regi Lushkja, që Guindo, pas kontrollit të Hamitit me VAR, e dërgoi me qetësi në rrjetë. Skënderbeu madje rrezikoi të shkonte në pushim me dy gola në pasiv, por në shtesë konkluzioni i Lushkjas u stampua në traversë.
Panorama nuk është se ndryshoi në pjesën e dytë, pavarësisht se tani skuadra e Josës e ka zhbllokuar rezultatin dhe luan me kundërsulm, në mundësitë që i jepen nga një kundërshtar që tentoi të dilte para, por nuk kishte idetë e vizionin për ta bërë. E kështu, në minutën e 65′ Guindo dribloi dy mbrojtës të korcarëve për të mposhtur edhe njëherë Rexhepin.
Me këtë fitore skuadra e Mirel Josës renditet në vendin e shtatë në kuotën e 8 pikëve, ndërsa Skënderbeu “noton në ujëra të turbullta” teksa klasifikohet në vendin e fundit në kuotën e 3 pikëve.
