Përplasje të forta, por me një epiqendër, në Loro Borici, aty ku të gjithë mbajnë sytë, për të përfituar nga sfida mes Vllaznisë e Tiranës. Sidomos Kukësi pas fitores së djeshme kundër Dinamos në javën e shtatë të Superiores. Skuadra e Longos tani pret një ndalesë të bardhebluve për ta vënë në presion.
Debuton të shtunën në pankinën e Lacit Josa, që kërkon të marrë fitoren e dytë radhazi për bardhezinjtë përballë Skënderbeut të vendit të fundit. Nuk kishte kundërshtar më të përshtatshëm për ta pritur në muret e shtëpisë për teknikun, edhe pse në këtë ndeshje ka shumë nostalgji duke qenë se përballë vjen ish-skuadra e tij në një situatë delicate.
Për Vllazninë është pikërisht momenti për tu shfaqur, sepse në Shkodër mbërrijnë kryesuesit e kampionatit, që kërkojnë arratinë në Loro Borici. Për Brdaric puna është e dyfishtë, të gjejë prekje morale për të lënë pas humbjen me Kukësin e zgjidhjen taktike për të befasuar Tiranën. 5 pikë lëvizin mes dy formacioneve e kuqeblutë nuk mund të lejojnë një tjetër hap fals, sidomos në Klasike, pas së cilët atmosfera mund të ndryshojë në varësi të rezultatit.
Ende në kërkim të fitores së parë në kampionat, Partizani duhet të harrojë një javë të trazuar, kur përballë të ketë Egnatian. Daja nuk do të jetë në pankinë, i skualifikuar pas ngjarjeve në derbi, ndërsa edhe tifozët nuk do të mund ta mbështesin. Ndoshta pak qetësi në këtë moment do ti bëjë punë të kuqve, përballë Maganit e të tijve, që kërkojnë të rikthehen tek fitorja pas humbjes me Teutën. Pikërisht durrsakët duhet të mundin Kastriotin për të reduktuar mundësisht pikët me kreun. Ndreu nga ana tjetër shpreson të largohet nga zona e rënies nga kategoria, por që ta bëjë në transfertën e kampionëve në fuqi është një mission i komplikuar.
SUPERIORE, JAVA 7
29/10/21
Dinamo 0 - 1 Kukësi
30/10/21
Laçi 13 : 45 Skënderbeu
Vllaznia 16 : 45 Tirana
31/10/21
Partizani 17 : 45 Egnatia
Teuta 17 : 45 Kastrioti
