Hotel "Fantazia" në Velipojë është pronë e familjes Ferracaku. Atë e menaxhojnë dy vëllezërit Kujtimi dhe Hasani. Hotel "Gocaj" është pronë e familjes Gocaj. Ai menaxhohej nga vëllezërit Edmondi dhe Xhovani, që çdo vit në verë kthehen nga Anglia.
Hotelet ndodhen rreth 50 metra larg njëri-tjetrit. Secilit i duhet një hapësirë në plazh për pushuesit e tij. Prej mëse një muaji kanë qenë në pritje që administrata e Ministrisë së Turizmit t'ua caktojë plazhet. Vitet e tjera ndarja e plazheve është bërë më herët. Këtë vit, inspektorët vonuan. Nuk dihet pse.
Fillimisht plazhin e ndanë bashkë, sipas ndarjes që iu ishte bërë një vit më parë. Familjet njiheshin prej vitesh. Më të vjetrit kishin miqësi. Problemet nisën kur inspektorët e Ministrisë së Turizmit caktuan për Ferracakët, hapësirën që po përdornin përkohësisht Gocajt në qershor.
Kujtim Ferracaku kërkoi që të lirohej hapësira e zënë nga Gocajt. Këto i thanë të priste, derisa shteti t'u caktonte edhe për ta hapësirën që u takonte për pushuesit e hotelit të tyre. Pretendimi ishte se Ferracakët po përdornin, ndërkohë një hapësirë tjetër dhe bashkë me atë që u caktoi shteti, bëheshin dy hapësira për hotel "Fantazia" dhe asnjë për hotël "Gocaj.
"Shteti është duke i ndarë se nuk ka mbaruar procesi. I kam pas unë vjet, sivjet ia dhanë atij. Tashi i kam thënë: Sa të vijë shteti! Se edhe mua më takon të mi japin, diku tjetër, por "sa të vijë shteti. Unë i kam pas afër, këtu i ke marrë ti. Ti gëzosh! Të vijë shteti tani" Ai ka, të vjetshmet është duke i shfrytëzu. U ngutën, erdhën me armë" tregoi Pjetër Gocaj, që u kërkoi gazetarëve ta mirëkuptonin. "Unë do fus në dhe dy djem" u shpreh ai.
Mosmarrëveshjet kishin nisur që pasditen e së shtunës. Ferracakët kërkonin plazhin që u caktoi shteti. Gocajt u kërkonin të prisnin, që shteti t'u caktonte edhe atyre një hapësirë. Por shteti vonoi dhe vonesa qe fatale.
[video width="640" height="352" mp4="https://cdnimpuls.com/lapsi.al/wp-content/uploads/2021/06/velipoja-1.mp4"][/video]
Natën e kaluar, dy djemtë e tij Edmondi dhe Xhovani Gocaj po qëndronin në hotel. Aty ishte kamarieri 20-vjeçar Myzerim Zeneli. Gjatë pasdites kishin pasur fërkime me Ferracakët për plazhin, kur në hyrje të hotelit ia behën të armatosur Kujtim Ferracaku, vëllai i tij Hasani dhe nipi i tyre, Milind Dyli.
Gjasat janë që edhe Gocajt ta prisnin sherrin dhe të ishin armatosur. Përplasja me armë nisi pak pas mesnate, tha policia dhe përfundoi me 4 të vrarë. Edmond dhe Xhovani Gocaj u vranë të dy. Kujtim Ferracaku po ashtu humbi jetën nga plumbat, ndërsa vëllai i tij, Hasani është rëndë në spital. Kamarieri 20-vjeçar që ishte në ditën e tij të parë të punës u vra nga breshëritë e plumbave. I plagosur mbeti edhe nipi i Ferracakëve, Milind Dyli, edhe ai në spital, me një plumb në këmbë.
"Kanë ardhur mbrëmë në derë të shtëpisë, të armatosur. Si tash e 30 vjet janë vra dhe për parking, armët kanë këto fenomene. Fatkeqësia jeme, ato i kam pasur shokë e kolegë, se në çfarë rrethanash ma kanë bërë këtë punë e me më ardhe tek dera" tregoi Pjetër Gocaj.
"Kallashi pa u ndal gjithë natën. Krismat nuk pushonin" tregoi një pushues nga Kosova, që bëhej gati të rikthehej në shtëpinë e tij. Nga fjalët e tij, duket se shkëmbimi i zjarrit ka vazhduar jashtë ambjenteve të hotelit dhe më tej.
Lexo edhe: Provokimi i Ramës me “Velipojën e dashur”, lumë komentesh negative në rrjetet sociale
Lexo edhe: Masakra në Velipojë/ Kamarieri 20-vjeçar u vra në ditën e parë të punës
Dinamika e vrasjeve në oborrin e Hotel "Gocaj", ku u vranë katër vetë nuk është zbardhur ende nga policia.
Përveç jetëve të humbura, imazhi i Velipojës është nxirë në kulmin e sezonit turistik. Kush do t'i kalojë pushimet në hotelet e pronarëve që shërbejnë të armatosur dhe i zgjidhin konfliktet me krisma?
Nëse shteti do të kishte vepruar më shpejt për caktimin e hapësirave të plazheve, tragjedia mund të ishte shmangur. Nxjerrja e përgjegjësive për këtë ngjarje të rëndë në administratën e Ministrisë së Turizmit duket një mision i pamundur. Si për ironi, kryeministri Rama sot shpërndau në rrjetet sociale foton e shezloneve dhe çadrave në plazhin e Velipojës. Foto më poshtë:
