Kosova është mundur 3-1 në Spanjë përballë Furive të kuqe, por ka lënë gjurmë me një gol spektakolar, që trembi jo pak iberikët, me rezultatin në atë moment 2-1. Mesfushori i Kosovës, Besart Halimi ka shënuar një gol të jashtëzakonshëm, nga mesi i fushës, duke i rrëmbyer topin portierit Simon, në një dalje aventureske deri në gjysëm të fushës.
Dani Olmo në minutën e 34 dhe Torres dy minuta më pas, shënuan një goditje të fortë për Kosovën në fundin e pjesës së parë. E megjithatë, gjërat u duk se mund të ndryshonin në minutën e 70. Unai Simon doli të rikuperojë një top në mesfushë, por Halimi ia rrëmben dhe godet direkt me të majtën nga afër mesfushës, për ta ndalur topin në fundin e rrjetës. Një gol spektakolar, ku pavarësisht përpjekjeve të mbrojtësve spanjollë, nuk ia dolën dot ta ndalin topin, i cili përfundoi në fundin e rrjetës.
Vetëm 5 minuta më pas Moreno stabilizoi diferencën prej dy golash, kur realizoi në minutën e 75, duke shfrytëzuar një assist të Koke e duke fiksuar shifrat në 3-1.
