Barazimi i tetë në 11 javë: Teuta merr një pikë me 1-1 kundër Tiranës, duke shtyrë takimin me fitoren në Niko Dovana. Skuadra e Edi Martinit vazhdon të jetë e pathyeshme, por rekordi i tetë barazimeve e penalizon në ndjekjen e kreut. Për Deden një tjetër ndalesë, pas atij me Kukësin, edhe pse këtë herë i shkoi pranë fitores pas avantazhit të pjesës së parë.
Me shumë mungesa në formacion, me të cilat tashmë Dede është mësuar, kampionët në fuqi u kujdesën më tepër të përfitonin nga gabimet e kundërshtarëve dhe të ruheshin në prapavijë. Strategjia e Dedes u duk fituese kur sulmuesi Grent Halili zhbllokoi ndeshjen pas 3 minutash, duke përfituar nga një pasiguri e kapitenit Arapi. Problemet para portës u shfaqën sërisht për të besuarit e Martinit, që suksesi 1-3 në Korcë vetëm e iluzionoi. Raste të shumta të shpenzuara para portës dhe vetëm në minutën e 70, zëvvendësuesi Devid Kapllani vendosi ekuilibrin sërisht shtatë minuta pasi hyri në fushë.
Teuta barazon me pikë Kukësin (17), por e kalon në renditje falë diferencës së golave, ndërsa Tirana mbetet në vendin e gjashtë me 15 pikë, duke u larguar akoma më shumë nga Vllaznia kryesuese dhe mbrojtja e titullit bëhet gjithnjë e më e pamundur.
