I dërguari i posaçëm i presidentit amerikan Donald Trump për bisedimet Kosovë-Serbi, Richard Grenell tha se marrëveshja e arritur më 4 shtator në Shtëpinë e Bardhë nuk është vetëm një marrëveshje tjetër në letër.
Grenell bëri këto komente gjatë vizitës në Beograd, këtë të martë. Odat ekonomike të Kosovës dhe Serbisë u pajtuan që të krijojnë një grup punues, i cili do të ndihmojë qeveritë e të dyja shteteve për të zbatuar projektet e marrëveshjes së 4 shtatorit, si dhe të ofrojnë mbështetje për zbatimin e projekteve të infrastrukturës, energjisë dhe krijimit të vendeve të punës.Ambasadori Grenell ritheksoi se vendet nuk do të ishin këtu pa presidentin Donald Trump i cili besoi se mund të bëhet diçka ndryshe dhe i cili beson se ekonomia duhet të vihet ne rend të parë.
Delegacioni amerikan qëndroi të hënën në Prishtinë ku nënshkroi një deklaratë të përbashkët me kryeministrin Avdullah Hoti, e cila garanton zbatimin e projekteve që dalin nga dakordimi i 4 shtatorit.
