Presidenti i Francës, Emmanuel Macron, deklaroi se vendet europiane duhet të jenë pjesë e tryezës së negociatave, sa herë që të zhvillohen bisedime paqeje për përfundimin e luftës në Ukrainë.
“Gjithmonë kemi mbështetur qëndrimin se, kur të zhvillohen negociatat, europianët duhet të jenë në tryezë, pasi bëhet fjalë për interesat e Europës”, u shpreh Macron, në përfundim të samitit të BE-së në Bruksel.
Ai shtoi se presidenti i Këshillit Europian, Antonio Kosta, mund të marrë pjesë në negociata të tilla, nëse roli i tij përcaktohet qartë.
Nga ana e tij, Kosta theksoi se Bashkimi Europian nuk është dhe nuk synon të jetë ndërmjetës në negociatat për përfundimin e luftës në Ukrainë, por mbetet në krah të Kievit.
“BE është në anën e Ukrainës dhe do të vazhdojë ta mbështesë gjatë dhe pas luftës”, deklaroi ai, duke shtuar se aktualisht nuk ka sinjale të besueshme nga Rusia për gatishmëri në negociata serioze.
Kosta nënvizoi se është e rëndësishme që BE të mbajë kanale të drejtpërdrejta komunikimi me Moskën. “Nuk mund të mbështetemi vetëm tek të tjerët për të interpretuar mesazhet ruse. BE duhet të jetë në gjendje të përcjellë drejtpërdrejt qëndrimet e saj”, tha ai.
Ai theksoi gjithashtu se nuk ka konkurrencë mes aktorëve të përfshirë në përpjekjet për paqe, duke sqaruar se vetëm Ukraina mund të negociojë në emër të saj, ndërsa partnerët mund të kontribuojnë në garantimin e sigurisë.
Në të njëjtën linjë, presidentja e Komisionit Europian, Ursula von der Leyen, deklaroi se Ukraina dhe Europa duan paqe, ndërsa Rusia është ajo që vijon të zgjedhë dhunën.
Ajo u shpreh se Europa duhet të jetë një nga arkitektet e një paqeje të drejtë dhe të qëndrueshme, me Ukrainën në qendër të procesit.
Sipas saj, herët a vonë Rusia do të detyrohet të ulet në tryezën e negociatave, kryesisht për shkak të presionit nga sanksionet europiane, duke theksuar nevojën për një mesazh të unifikuar europian ndaj presidentit Vladimir Putin.
