Mbyllja e menjëhershme e ekonomisë në mars, kufizimi i orarit të bankave, kalimi i një pjese të punës nga shtëpia ushtruan presion mbi kompanitë, por edhe individët për kryerjen e pagesave të ndryshme online.
Ndërsa bankat reklamonin pagesat online, pak biznese apo dhe individë ishin të regjistruar për të kryer këtë shërbim nga kompjuteri i shtëpisë, apo i zyrës, pa u detyruar të mbanin radhë në bankë.
Të dhënat e Bankës së Shqipërisë për transaksionet e ashtuquajtura “home banking” tregojnë se ka pasur reflektim nga bizneset dhe individët, që duket se kanë nxituar ta bëjnë funksional këtë shërbim. Në qershor, si numri i transaksioneve me home banking, ashtu dhe vlera e tyre shënuan rritje te ndjeshme në krahasim me muajt e mëparshëm. Në qershor u realizuan 350 mijë transaksione, me një rritje prej 15% në krahasim me muajin e mëparshëm. Edhe në vlerë, transaksionet arritën në 94 miliardë lekë (rreth 760 milionë euro), me një zgjerim prej 24% në raport me majin, duke shënuar nivelet më të larta se në vlerë ashtu dhe numër në krahasim me gjithë muajt e deritanishëm të 2020-s.
Të dhënat e Bankës së Shqipërisë tregojnë se që nga viti 2014 ka pasur një rritje të shpejtë të përdorimit të ‘home banking’, kryesisht nga bizneset. Në 2019-n, numri i transaksioneve dhe vlera e shërbimeve ‘home banking’u rritën përkatësisht me 24% dhe 8%.
Pas fillimit të pandemisë Bankat raportuan se kishte një rritje të dukshme të përdorimit të internet dhe moblile banking, pagesave me karta debiti dhe krediti në vend të “cash” apo përdorimit të ATM në vend të arkave që vjen si rrjedhojë e situatës por që me shumë gjasa do të mbetet edhe pasi kjo valë të kalojë.
Për bankierët, E-Banking është sot zgjidhja alternative më e mirë për të marrë disa shërbime me kosto më të ulët dhe në një kohë të shkurtër, por theksojnë se ndoshta është koha të merren disa politika stimuluese për të rritur përdorimin, në një popullatë që preferon tradicionalen e paraqitjes fizike dhe “cash”-in.
Megjithatë, një sondazh i mëparshëm i Shoqatës së bankave, i publikuar në fillim të këtij viti, para pandemisë, gjeti se shumca e klientëve preferojnë kontakte direkte me bankën. Rreth 85% e të anketuarve kontaktojnë direkt me bankën, duke vizituar një prej degëve të saj, ndërsa ekziston gjithashtu një përqindje e lartë edhe e atyre që kontaktojnë me bankën nëpërmjet email-eve apo nëpërmjet aplikacioneve të instaluara në telefonat e tyre celularë.
Forma të tjera të kontaktit me bankën përfshijnë ëebsite-n bankës, shërbimet call-center të bankës dhe kontaktin e drejtpërdrejtë me stafin e saj. Të dhënat e mëtejshme tregojnë se përdorueset gra të shërbimeve/ produkteve bankare janë më të predispozuara të përdorin email-et e tyre si formën më të zakonshme të komunikimit me bankën, krahasuar edhe me përdoruesit burra.
Nga ana tjetër, këta të fundit përdorin si formë më të shpeshtë komunikimi me bankën, aplikacionet e tyre në telefonat celularë. Në lidhje me mënyrat e tjera të komunikimit me bankën, dallimet ndërmjet gjinive janë shumë të vogla. Duke analizuar grupmoshat, më të moshuarit kanë një tendencë më të madhe për të kontaktuar me bankën duke shkuar personalisht në një prej degëve të saj.
