Portieri legjendar egjiptian Essam El Hadary tërhiqet në moshën 47 vjecare. Njoftimi, si bën të ditur ghanasoccernet.com, është dhënë të enjten gjatë një emisioni televiziv. Numri 1 i famshëm e ka marrë këtë vendim pasi nuk u grumbullua për Kupën e Afrikës 2019. “Futbolli është gruaja ime e dytë e sapo u divorcuam. Nuk kthehem të luaj përsëri, i gjithë sistemi është tani në krizë me shefat e klubeve që sulmojnë njëri-tjetrin. Që Zoti i ndihmoftë lojtarët!”, ka thënë El-Hadary. “Nuk ka asgjë për ti shtuar historisë sime futbollistike. Nuk ka portier në Egjipt më të mirë se unë. Jam ulur në pankinë në 1998 vetëm për kolegun Nader El-Sayed”, ka sqaruar.
El Hadary ka grumbulluar 150 ndeshje ndërkombëtare me Egjiptin nga debutimi i tij në 1996. Ka fituar Kupën e Afrikës katër herë (tre radhazi) e është zgjedhur portieri më i mirë i turneut në tre raste. Në Botërorin 2018 në Rusi, në moshën 45 vjecare e 161 ditë, u bë lojtari më i vjetër në histori që luante një ndeshje të Kupës së Botës.
High Dam (Diga, nofka e tij) ka kaluar pjesën më të madhe të karrierës me Al Ahly mes 1996 e 2008, ku fitoi tetë tituj egjiptianë, tre kupa e katër superkupa kombëtare, tre Champions League afrikane, tre superkupa CAF, një Arab Club Champions Cupe e dy superkupa arabe.
El Hadary ka luajtur edhe me Sion në Zvicër në sezonin 2008-2009, duke fituar një kupë nacionale. Eksperiencat e tjera i ka me sudanezët e Al Merreikh SC (dy kampionate e kupa kombëtare të fituara mes 2011 e 2013), Al Taawoun në Arabi Saudite e përsëri në Egjipt me Ismaily SC, Wadi Degla SC, Zamalek SC, Ittihad Alexandria e Nogoom FC.
