Kryetari i Partisë Demokratike Lulzim Basha do të zhvillojë prej së hënës një vizitë 2-ditore në Kosovë, me ftesë të Kryeministrit të Kosovës Avdullah Hoti. Basha do të takohet me drejtuesit më të lartë të shtetit dhe politikës së Kosovës.
Burime të lapsi.al thanë se të hënën më 20 Korrik 2020 Basha do të takohet në ora 11.00 me Kryeministrin Avdullah Hoti në selinë e qeverisë. Një orë më pas, në 12.00 Basha do të takohet me Presidentin Hashim Thaçi në zyrën e këtij të fundit.
Në ora 13.00 ai do të ketë një drekë pune me Kryetarin e Lëvizjes Vetëvendosje Albin Kurti dhe në ora 15.00 do të pritet nga Kryetarja e Kuvendit Vjosa Osmani.
Në orën 16.00 Basha do të takohet me Kryetarin e AAK-së, Ramush Haradinaj në selinë e këtij të fundit. Një orë më pas kreu i PD-së do të pritet nga Fatmir Limaj, Kryetari i Partisë Nisma për Kosovën.
Takimet e fundit të Bashës për të hënën do të jenë në ora 17:45 me drejtuesit e LDK-së dhe në ora 18:30 me drejtuesit e PDK-së.
Të martën, Kryetari i Partisë Demokratike do të takohet me Kryetarin e Komunës së Prishtinës Shpend Ahmeti dhe me Kryetarin e Komunës së Mitrovicës Agim Bahtiri. Basha do të zhvillojë homazhe pranë varrit të Presidentit Ibrahim Rugova, varrit të Isa Boletinit në Boletin, si dhe do të zhvillojë homazhe te Memoriali i Jasharëve në Prekaz.
Të njëjtat burime thanë se Basha do të shoqërohet nga nënkryetari i PD-së Edi Paloka, Besnik Mustafa, ish Ministër i Jashtëm dhe Kryetar i Këshillit të Ambasadorëve Shqiptarë, Kreshnik Collaku, anëtar i Kryesisë së PDSH dhe Arben Cejku, ish ambasador dhe drejtues i Qëndrës Shqiptare për Mirëqeverisje. ©LAPSI.al
