25 lojtarë dhe 9 në dispozicion për dy transferta shumë të rëndësishme. Seleksionimi i teknikut të Kombëtares Edy Reja ka risi dhe befasi, që vërtetë një pjesë të tyre italiani i ka shpjeguar në konferencën për shtyp, por nga ana tjetër tregon guximin e teknikut për të rinovuar skuadrën, në kohën kur rezultatet e këtyre ndeshjeve janë vendimtare për objektivin kualifikim të kuqezinjve.
Reja ka lënë jashtë Mavrajn e Sadikun, me shpjegimin elegant të kërkesës së tyre dhe operacionit të kapitenit, ka kaluar në listë dispozicioni Xhakën dhe kjo është domethënëse për një lojtar që ka bërë zhurmë edhe kur nuk ishte në formacion. Janë konfirmuar ndërkohë emrat e Kumbullës, që vjen nga goli në Serie A, Bares dhe Qoses të cilët po kalojnë një formë shumë të mirë në këtë fillim sezoni.
Italiani i ka besuar dy zgjedhjeve të reja: talenti i Twente, Lindon Selahi dhe ai i Young Boys Taultant Seferi, protagonist në Europa League. Në dispozicion, në rast të ndonjë dëmtimi të mundshëm të 25 lojtarëve të përzgjedhur, krahas Taulant Xhakës, janë edhe Uzuni, Balliu, Aliji, Vrioni, Memolla, Çekiçi, Broja dhe Kaçe.
