Ministri i Brendshëm, Sandër Lleshaj, i është përgjigjur përmes një postimi në “Twitter”, thirrjes së kryetarit të Partisë Demokratike, Lulzim Bashës, drejtuar policëve që të mos iu binden urdhrave të tij për ndalimin e protestuesve gjatë fushatës.
Referuar protestës së djeshme të zhvilluar në Librazhd, ku një grup personash tentuan të bllokonin eskortën e kryeministrit Edi Rama, duke hedhur në drejtim të saj sende rrethanore dhe flakadanë, Lleshaj shkruan se Basha është përgjegjës për çdo individ që aktivizon kundër ligjit dhe lirive politike në vend dhe shtoi se askush nuk do tolerohet.
STATUSI I PLOTË
“Lulzim Basha është përgjegjës për çdo individ që aktivizon kundër ligjit dhe lirive politike në vend! Pengimi i subjekteve zgjedhore dhe përdorimi i lëndëve plasëse, kundër atyre dhe forcave të rendit janë vepra penale. Askush nuk do të tolerohet. Kush u përgjigjet thirrjeve për paligjshmëri, do të përballet me ligjin.”- shkruan ministri.
Pas protestës në Librazhd, Policia arrestoi 7 persona, mes të cilëve edge drejtues e ish-deputetë të PD-së, si dhe procedoi 23 persona të tjerë.
Kryedemokrati Basha reagoi përmes një deklarate duke thënë se protestuesit u ndaluan me urdhër politik të Ramës, ndërsa e akuzoi ministrin Lleshaj dhe kryeprokuroren Arta Marku, si vegla të paskrupullta që e kanë kthyer policinë dhe prokurorinë në instrumenta të represionit politik në shërbim të pushtetit personal dhe të korruptuar të Edi Ramës.
