Një kopje jashtëzakonisht e rrallë e Deklaratës së Pavarësisë së Shteteve të Bashkuara është gjetur në Arkivat Kombëtare në Kew të Britanisë së Madhe.
Dokumenti historik u zbulua në shkurt nga një vullnetar i cili po rendiste dokumentet e oficerëve të Marinës Mbretërore nga periudha e Luftës Civile Amerikane.
Kjo është një nga 11 kopjet e shtypura në Exeter, New Hampshire, në korrik 1776, për të përhapur lajmin e pavarësisë së kolonive amerikane. Menjëherë pas kësaj, kjo kopje e veçantë përfundoi në duart e britanikëve.
Vullnetari Michael Scarr e përshkroi momentin kur kuptoi se çfarë kishte gjetur, duke thënë se ndjeu ankthin dhe emocionin e zbulimit.
“E thirra shefin tim dhe i thashë: “Mendoj se duhet të vish ta shikosh këtë”, - i tha ai BBC-së.
Kreu i Arkivave Kombëtare, Sol Nasser, e quajti këtë një "zbulim të jashtëzakonshëm ", duke vënë në dukje se ishte një kopje jashtëzakonisht e rrallë e Deklaratës e gjetur jo në Amerikë, por në Britani.
Dokumenti ishte sekuestruar nga Marina Mbretërore në prag të Krishtlindjeve të vitit 1776, kur HMS Raisonable kapi anijen amerikane Dalton në brigjet e Portugalisë pas një ndjekjeje 7-orëshe.
Sipas Dr. Graham Moore të Arkivit Kombëtar, ky është një nga botimet më të rralla të Deklaratës, pasi kopjet e asaj periudhe nuk u bënë për ruajtje, por për shpërndarje të shpejtë nëpër koloni.
Kopja u gjet e palosur midis letrave të Kapiten Thomas Fitzherbert. Ajo u çua për herë të parë në Plymouth në janar 1777 dhe më pas në Whitehall, Londër.
Për shekuj me radhë kishte mbetur “e fshehur” në arkivat shtetërore, pasi oficeri i Marinës Mbretërore që e regjistroi atë në atë kohë e përshkroi atë thjesht si "një dokument tjetër", pa kuptuar vlerën e tij historike.
Dokumenti tani është çuar në ruajtje, ndërsa janë bërë punë për të stabilizuar letrën dhe për të riparuar dëmtimet e vogla, në mënyrë që të mund të studiohet dhe të ekspozohet për publikun.
Ai do të paraqitet në ekspozitën "Revolucioni 250: Historia e Pavarësisë së Amerikës, 1763-1783" në Arkivat Kombëtare të Britanisë. ©LAPSI.al
