Situata është tensionuar ndjeshëm para Kryeministrisë, ku gjatë protestës janë hedhur bomba molotov në drejtim të godinës së qeverisë. Një prej mjeteve ndezëse ka përfunduar pranë hyrjes së Kryeministrisë, ndërsa në bulevard kanë vijuar përplasjet dhe thirrjet e protestuesve.
Në të njëjtën kohë, efektivë të policisë janë pozicionuar në tarracat e Kryeministrisë dhe Kuvendit, nga ku kanë fotografuar dhe monitoruar turmën. Disa prej të rinjve kanë përdorur lazerë në drejtim të pozicioneve të policisë, duke tentuar të pengojnë fotografimin dhe identifikimin e tyre nga lart. Protesta u zhvendos para Kryeministrisë pas marshimit që nisi nga Ministria e Arsimit, ku më herët u regjistruan tensione, hedhje sendesh dhe ndërhyrje të policisë me gaz lotsjellës.
