Një minator ka humbur jetën në një galeri private në zonën e Batrës, në Martanesh, pas shembjes së një masivi kromi. Viktima është 62-vjeçari Gëzim Muça, i cili në momentin e aksidentit po punonte në frontin e nxjerrjes së mineralit.
Sipas informacioneve paraprake, një masiv është shkëputur dhe e ka zënë poshtë, duke i shkaktuar plagë të rënda. Kolegët e tij kanë njoftuar menjëherë ambulancën dhe Policinë, por 62-vjeçari është gjetur pa shenja jete. Policia ka nisur hetimet për të sqaruar dinamikën e aksidentit dhe shkaqet që çuan në shembjen e masivit. Ngjarja rikthen në vëmendje çështjen e sigurisë në galeritë minerare dhe rrezikun me të cilin përballen punonjësit e sektorit.
