Madonna ka ngjallur sërish kuriozitet te fansat me këngën e saj të re “Bizarre”, pjesë e albumit Confessions II, ku shumë besojnë se artistja i drejton disa mesazhe ish-bashkëshortit të saj, Sean Penn.
Edhe pse emri i aktorit nuk përmendet në tekst, Madonna këndon për një yll të Hollywood-it me “sy blu të thellë”, i cili ndihej i kërcënuar nga fama e saj. Në një varg ajo përmend edhe një Shelby Cobra, duke rikthyer kujtimet e makinës sportive që thuhet se ia dhuroi Penn-it kur u martuan në vitin 1985.
“Shtrove tapetin e kuq për ne, por nuk doje ta ndaje me mua. Besoj se ndiheshe i kërcënuar nga unë, edhe pse nuk e pranoje”, këndon Madonna në një pjesë të këngës.
Artistja vijon duke e përshkruar dashurinë si “të çuditshme”, ndërsa flet për ndjenjën e boshllëkut pas ndarjes dhe për një marrëdhënie të mbushur me pasion, por edhe me tension.
Madonna dhe Sean Penn ishin të martuar nga viti 1985 deri në vitin 1989. Marrëdhënia e tyre u shoqërua me ulje-ngritje, megjithatë të dy kanë ruajtur një raport miqësor ndër vite. Në vitin 2015, Madonna doli publikisht në mbrojtje të aktorit, duke mohuar akuzat se ai kishte ushtruar dhunë fizike ndaj saj.
Kënga “Bizarre” publikohet zyrtarisht të premten, ndërsa fansat kanë nisur tashmë të analizojnë tekstin, duke besuar se ai është frymëzuar nga historia e dashurisë së artistes me Sean Penn.
