Cristiano Ronaldo vendos topin në pikën e bardhë me fytyrën e tensionuar. Atij i takon të ekzekutojë penalltinë që i jep Portugalisë barazimin e përkohshëm ndaj Kroacisë. Kamerat kapin lëvizjen e buzëve të CR7, i cili para goditjes duket se pëshpërit dy herë: “Bismillah”, shkurtim i formulës “Bismillah ir-Rahman ir-Rahim” (“Në emër të Allahut, Mëshiruesit, Mëshirëbërësit”). Është një shprehje që besimtarët myslimanë e përdorin para një veprimi të rëndësishëm ose edhe në jetën e përditshme, si shenjë besimi dhe kërkimi mbrojtjeje.
Por a e tha vërtet Ronaldo këtë?
Nuk ekziston asnjë konfirmim zyrtar dhe nuk ka një audio të pastër të atij momenti. Gjithçka mbështetet vetëm te interpretimi i lëvizjes së buzëve. Për këtë arsye, shumë tifozë portugezë besojnë se ai në fakt ka thënë diçka tjetër: “Vais marcar, vai marcar, vais marcar!” Në portugalisht kjo do të thotë: “Do të shënosh”, një mënyrë për t’i dhënë zemër vetes në një moment vendimtar.
Did Cristiano Ronaldo say 'bismillah' twice before shooting his penalty kick against Croatia? ? pic.twitter.com/wOWINH7v1s
— Muslim (@Muslim) July 3, 2026
A është konvertuar Cristiano Ronaldo në Islam?
Përgjigjja është jo. Nuk ekziston asnjë provë që Cristiano Ronaldo të jetë konvertuar në fenë islame. Fotot që kanë qarkulluar në internet gjatë viteve të fundit, ku ai shfaqej gjoja në Mekë ose gjatë një ceremonie konvertimi, janë përgënjeshtruar dhe në shumë raste kanë rezultuar të manipuluara ose të krijuara me inteligjencë artificiale.
Ish-lojtari i Real Madrid ka treguar gjithmonë publikisht besimin e tij katolik dhe vazhdon të bëjë shenjën e kryqit pas shumë golave të tij, ndërsa njëkohësisht ka shfaqur respekt për fenë dhe traditat e vendit ku jeton dhe luan.
Cristiano Ronaldo ka përqafuar me respekt kulturën arabe, gjuhën, përshëndetjet, zakonet dhe respektin për lutjen, por pa ndryshuar fenë e tij. Prandaj, edhe nëse ai ka thënë vërtet “Bismillah”, nuk do të ishte hera e parë që përdor këtë shprehje. Ai e ka bërë edhe më parë gjatë ndeshjeve me fanellën e Al-Nassr.
Respekti i CR7 për kulturën saudite
Që nga transferimi në Arabinë Saudite në fillim të vitit 2023, Ronaldo ka treguar vazhdimisht respekt për kulturën vendase. Ai është parë duke veshur bisht-in tradicional, duke uruar “Eid Mubarak” gjatë festave islame (Fitër Bajramit dhe Kurban Bajramit), duke përshëndetur tifozët me “Wa alaykum assalam” (“Paqja qoftë mbi ju”) dhe duke përdorur edhe shprehje të tjera në gjuhën arabe gjatë aktiviteteve publike.
Megjithatë, ai nuk ka deklaruar kurrë zyrtarisht se dëshiron të konvertohet në Islam. Shumë myslimanë e vlerësojnë pikërisht për këtë respekt ndaj kulturës së tyre, ndërsa të tjerë e kritikojnë sepse mbetet i krishterë dhe vazhdon të bëjë gjeste tipike të traditës perëndimore.
