Spanja dominoi dhe fitoi bindshëm ndaj Austrisë, duke siguruar kualifikimin në 1/8-at e finaleve të Botërorit. Në pjesën e parë, skuadra e drejtuar nga Luis de la Fuente kaloi në avantazh falë golit të Mikel Oyarzabal, pasi më herët një rrjetë e Marc Cucurella ishte anuluar. Në fraksionin e dytë, Pedro Porro dyfishoi me kokë, ndërsa në fund Oyarzabal realizoi golin e tretë, duke vulosur fitoren 3-0. Në raundin tjetër, Lamine Yamal me shokë do të përballen me fituesen e sfidës mes Portugalisë dhe Kroacisë.
Spanja dominon pjesën e parë me golin e Oyarzabal
Pjesa e parë në SoFi Stadium të Los Anxhelosit ishte plotësisht nën kontrollin e “La Roja”, me Austrinë që nuk arriti të reagojë dhe të krijojë raste të rrezikshme. Takimi nisi me dy tentativa të Lamine Yamal dhe Dani Olmo, të cilët provuan nga afër, por pa gjetur rrjetën. Reagimi i Austrisë nuk erdhi. Sa herë që Spanja afrohej pranë zonës kundërshtare, krijonte menjëherë rrezik. Rasti më i mirë për austriakët erdhi kur Gregoritsch tentoi të godiste me kokë pas një krosimi të Sabitzer, por nuk arriti të devijonte topin.
Ishte pothuajse e vetmja mundësi serioze e Austrisë, e cila u zgjua vetëm në minutat e fundit të ndeshjes. Ndërkohë, Spanja kishte arritur të shënonte me mbrojtësin Cucurella, por arbitri e anuloi golin për një faull të mëparshëm ndaj portierit.Pak më vonë, goli i avantazhit erdhi dhe këtë herë ishte i rregullt. Oyarzabal dërgoi topin në rrjetë pas një krosimi nga e majta të vetë Cucurellas. Përpara përfundimit të pjesës së parë, Baena goditi traversën nga një goditje dënimi. Topi përfundoi në mënyrë të pabesueshme te Yamal, i cili nga dy hapa larg portës u ndal nga portieri Schlager. Ky ishte edhe episodi i fundit i pjesës së parë, që u mbyll me rezultatin 1-0.
Spanja e mbyll ndeshjen në pjesën e dytë
Spanja e nisi pjesën e dytë aty ku e kishte lënë, me disa tentativa radhazi nga Oyarzabal dhe Rodri, por pa arritur të realizonte menjëherë golin e dytë. Skuadra e De la Fuentes kërkonte me ngulm ta mbyllte ndeshjen për të shmangur çdo surprizë. Yamal vazhdonte të ndizte aksione të rrezikshme, ndërsa Austria u bë më kërcënuese pas hyrjes në fushë të Kalajdzicit. Ky i fundit, pas një krosimi nga e majta dhe një lëvizjeje të Arnautovic që i hapi hapësirën, goditi me kokë, por topi përfundoi pak mbi traversë. Pikërisht në momentin kur dukej se Austria mund të rikthehej në lojë, Spanja gjeti më në fund golin e shumëpritur të dytë.
Aksioni nga krahu i majtë i Baenës ishte perfekt. Pasi u shërbye nga Dani Olmo, ai krosoi në qendër të zonës, ku Pedro Porro u shkëput bukur dhe me një goditje me kokë realizoi golin e 2-0. Me këtë avantazh, “La Roja” administroi rezultatin pa hequr dorë nga loja sulmuese dhe krijimi i rasteve të tjera. Në minutat e fundit Austria provoi sërish të rihapte ndeshjen, por ishte Spanja ajo që shënoi edhe një herë. Oyarzabal kompletoi dygolëshin personale, duke shfrytëzuar një tjetër asist nga e majta i Cucurellas dhe dërgoi topin në rrjetë për rezultatin përfundimtar 3-0. Spanja siguron kështu kualifikimin në 1/8-at e finaleve, ku do të përballet me fituesen e duelit mes Portugalisë dhe Kroacisë.
