Shtetet e Bashkuara siguruan kualifikimin në 1/8-at e finaleve të Botërorit 2026. Amerikanët mposhtën 2-0 Bosnjën, skuadrën që kishte eliminuar Italinë në play-off për t’u kualifikuar në këtë kompeticion. Skuadra e teknikut Mauricio Pochettino fitoi falë golave të Balogun në minutën e 45' dhe Tillman në të 82'. Në mes, në minutën e 64', vetë Balogun u ndëshkua me karton të kuq. Tashmë SHBA-ja do të përballet me Belgjikën, që u kualifikua pas përmbysjes dramatike ndaj Senegalit.
Vazhdon kështu rrugëtimi i amerikanëve në Botërorin e organizuar në shtëpi. Skuadra zhvilloi një ndeshje intensive, duke kaluar në avantazh në fund të pjesës së parë falë Folarin Balogun. Në pjesën e dytë SHBA-ja mbeti me një lojtar më pak pas përjashtimit të sulmuesit, por vazhdoi të mbrohej me rregull dhe disiplinë. Bosnja u përpoq të reagonte, duke krijuar disa raste të mira, por nuk arriti të mposhtte mbrojtjen amerikane. Goditjen përfundimtare e dha Malik Tillman me një goditje dënimi spektakolare.
Kjo fitore konfirmon rritjen e kombëtares së drejtuar nga Mauricio Pochettino, e cila tregoi se di të vuajë dhe të godasë në momentet vendimtare. Publiku në Santa Clara mbështeti skuadrën gjatë gjithë 90 minutave, duke krijuar një atmosferë fantastike. Me këtë sukses, Shtetet e Bashkuara vazhdojnë aventurën në turne dhe në 1/8-at e finaleve do të përballen me Belgjikën. Bosnja, nga ana tjetër, i jep lamtumirën kompeticionit pas një paraqitjeje të guximshme, por të pamjaftueshme për të ndalur vendasit.
