Mes të arrestuarve pë protestën kundër Ramës në Librazhd janë edhe kryetari i Degës së PD-së Librazhd, Bujar Vreto 48 vjeç, si dhe ish-deputeti Aurel Bylykbashi 53 vjeç. Po ashtu edhe sekretari i Degës së PD-së në Librazhd E.Gurra 32 vjeç.
Policia njoftoi arrestimin e 7 personave dhe procedimin e 23 të tjerëve për protestën e një ditë më parë në Librazhd, teksa kryeministri i vendit Edi Rama shkonte për fushatë.
Referuar pamjeve filmike, policia ka identifikuar personat që kanë hedhur sende drejt makinës së kryeministrit.
“Arrestimi dhe proçedimi i këtyre personave u bë pasi në datën 13.06.2019, rreth orës 18:00 këta shtetas janë grumbulluar në rrugën nacionale në hyrje të qytetit të Librazhdit tek kryqëzimi i Përrenjasit dhe në vijim kanë tentuar që të bllokojnë rrugën nacionale Elbasan – Librazhd, në hyrje të qytetit të Librazhdit, duke penguar eskortën e Kryeministrit dhe kanë goditur eskortën me sende të forta e lëndë plasëse piroteknike. Materialet proçedurale u referuan në Prokurorinë pranë Gjykatës së Shkallës së Parë Elbasan”,- sqaron policia.
