Pas zbulimit të sasisë rekord prej 613 kilogramë kokainë, në njërin prej kontejnerëve, autoritetet urdhëruan që kontrollit t’i nënshtroheshin edhe dy të tjerët, pasi Arbri Garden kishte porositur në Kolumbi tre kontejnerë me banane, që mbërritën në Portin e Durrësit, në muajin shkurt dhe ishin të pritje të zhdoganimit.
Ngarkesat rezultuan të pastra, por autoritetet janë të rezervuara për të konfirmuar faktin nëse malli është tërhequr nga kompania apo ndodhet në Portin e Durrësit. Për momentin policia dhe prokuroria po vijojnë hetimet për të zbuluar se kush fshihet pas ngarkesës së madhe të drogës.
Në këtë kuadër, prokuroria për Krime të Rënda ka sekuestruar të gjithë dokumentacionin e kompanisë nga ku rezulton se që prej themelimit në vitin 2012, për llogari të Arbri Garden në portin e Durrësit kanë mbërritur 400 ngarkesa nga Kolumbia dhe Ekuadori.
