Pak orë pas arrestimit, LSI ka mbrojtur Dashamir Xhikën, ish drejtorin e Autoritetit Rrugor, që akuzohet për abuzime me rrugën Tiranë-Elbasan.
Në emisionin Java në RTSH, Monika Kryemadhi deklaroi se arrestimi i Xhikës është politik dhe i organizuar nga mazhoranca.
“Arrestimi i djeshëm është një arrestim politik. Dashamir Xhika është kryetar i LSI në Elbasan. Ai është arrestuar nga një prokurore që e ka dosjen prej 3 vitesh, mbas 3 vjetëve, unë s’kam parë të mbahet një dosje 3 vite. Kjo do të thotë që ka bërë shantazh.
Presion politik që ushtron Taulant Balla me Qazim Sejdinin ndaj LSI-së në Elbasan. Akuzohet Dashamir Xhika për një tender të 2008-ës kur nuk kishte lidhje as me PS as me PD.
Dashamir Xhika është djalë shumë serioz, do përballet me drejtësinë e Edi Ramës dhe do ta fitojë. Do tu përgjigjet atyre që e kanë sajuar, sepse nuk mund të arrestosh një drejtor për një tender që nuk e ka kryer ai”, deklaroi Kryemadhi.
Prokuroria dyshon se Xhika dhe të arrestuarit e tjerë kanë shpërdoruar detyrën, apo kanë vjedhur gjatë tenderimit të rrugës Elbasan-Gjinar dhe rehabilitimit të këtij aksi rrugor.
Përveç Andi Tomës, ish-drejtor i përgjithshëm nga 2008 deri më 2013 dhe pasuesit të tij Dashamir Xhika, që e drejtoi autoritetin rrugor deri në vitin 2017, janë arrestuar edhe administratori i punimeve, Rexhep Tarba dhe dy adminiëstratorët e firmës që duhet të kishte kryer punimet, Kujtim Hysa dhe Agron Hysa.
