Pas tragjedisë së Manchester-it nëpër rrugët e qytetit kudo sheh njerëz të cilët vendosin buqeta me lule dhe dedikime pranë vendit ku ata humbën jetën.
Disa i kujtojnë me lule, disa të tjerë me mesazhe ngushëlluese dhe së fundmi, një pjesë e mirë me anë të një simboli.
Një bletë, është tatuazhi simbolizues që shumë qytetarë zgjodhën ta kenë përjetë në trupin e tyre në nder të viktimave.
Bleta, gjithmonë ka simbolizuar Manchesterin si një qytet shumë aktiv në botën industriale.
E ndërsa tani, ajo simbolizon të gjithë ata që humbën jetën, fuqinë dhe bashkimin e gjithë vendit.
Sipas CNN e gjithë kjo filloi nga artisti i tatuazheve Sam Barber i cili mendoi t’i ftonte të gjithë në shenjë solidariteti me viktimat dhe familjet e tyre.
Ata që vendosën t’i bashkohen kësaj, paguan rreth 50 paund të cilat do të shkojnë në llogari të të lënduarëve.
Ai u shpreh se bleta simbolizonte fuqinë që qyteti gjithmonë ka patur për të qendruar të bashkuar në çdo situatë.
E gjithë kjo, është përhapur me shpejtësi marramendëse përmes rrjeteve sociale dhe të gjithë nuk vonuan të tregonin tatuazhet e tyre në Britani, Kanada, Amerikë dhe jo vetëm.
Deri pak orë më parë janë mbledhur rreth 30.000 paund dhe organizatorët shprehen se janë krejtësisht të habitur nga reagimi i njerëzve rreth kësaj ideje.
