Qendra Rinore e Tiranës pati një aktivitet jo si të tjerët ditën e djeshme. Qendra Kulturore & Filozofike “Akropoli i Ri” promovoi volumin e parë të revistës “Filozofikja”. “Filozofikja” është revista e parë e karakterit filozofik në Shqipëri, e cila, sipas drejtuesit të qendrës, do të hedhë gurin e parë të themelit të një ndërtese shumë të lartë për filozofinë në vendin tonë.
- Si u themelua qyteti mitik i Romës
- Egjipti i Lashtë, qytetërimi dhe cfarë vjen nga ai deri në ditët e sotme
- Mitologjia
- Kush janë themeluesit nga ku ndërtohen të gjitha rrymat filozofike në mbarë botën
- Psikologjia e ngjyrave dhe kinematografia filozofike
Këto janë disa prej temave që gjenden në këtë revistë, duke ofruar një optikë ndryshe nga ajo që haset shpesh në tekset e shkollave tona në lëndën e filozofisë e psikologjisë. Përpos tentativës për të qenë të parët në një terren jo komercal, si ai i filozofisë, ajo që “Filozofikja” ofron, është një qasje e re të të menduarit dhe vepruarit, duke mos e shikuar filozofinë vetëm si një “pronë” e intelektualëve apo mendimtarëve racionalë, por si një mënyrë jetëse për çdo person.
Drejtuesi i qendrës Kulturore & Filozofike “Akropoli i Ri”, shprehet se këtë mënyrë të menduarit filozofik mundohet ta aplikojë në çdo aspekt të jetës së tij dhe anëtarëve të qendres. Ajo çka e bën të veçantë “Filozofiken” është fakti se është një revistë e shkruar nga persona vullnetarë dhe nuk ka qëllim përfitimin monetar, por trasmetimin e dijeve, u shpreh ditën e djeshme drejtuesi i Akropolit të Ri. Kështu, “Filozofikja” shndërrohet në një ftesë për të gjithë ata që duan të bëhen pjesë e një zinxhiri të lashtë dijesh.
