Deputeti socialist Taulant Balla ka zbritur në terren për të shuar flakët e protestave dhe për t’u dhënë një leksion financiar pensionistëve mbi mrekullinë ekonomike që pritet të sjellë investimi i Jared Kushner në Zvërnec. Dhe sipas formulës së re ekonomike të prezantuar prej tij, shifrat e parave që do të përfitojmë do të shumëfishohen me shpejtësi. Ato shumëzohen, shumohen, riprodhohen dhe qarkullojnë aq shumë sa në fund pensionistët mund të dalin fituesit më të mëdhenj të resortit luksoz.
Në një video që po qarkullon me shpejtësi në rrjetet sociale Balla u shpjegoi të pranishmëve se 4 miliardë euro investim nuk janë në fakt 4 miliardë euro.
“Kur investohen 4 miliardë, vlera e tyre në ekonomi nuk është 4, është 8, është 12, sepse fillon qarkullimi. Do marri tullën, do marrë tjergullën, do marri çimenton, do marri pemët që do mbjelli se do mbillen pemë të tjera.
Ato quhen qarkullim dhe nuk janë më 4 miliardë dhe nëse ata thontë se do investojnë 4 miliardë, vlera e tyre në ekonomi është më e madhe. Që do të thotë, po ta bëj një llogari të trashë.
Vetëm TVSH 20% nga 4 miliardë, është 800 milionë, që shkojnë në buxhet të shtetit. Po nëse marrim 800 milionë më shumë në buxhet të shtetit, natyrshëm nuk do kemi më 250 milionë euro për pensionet por do kemi 500 milionë. Çohen ca tashi e thonë, jo nuk dua unë. Po kush je ti?”
Ndërsa Balla vizatonte me duar rrugëtimin e miliardave nga resorti te tulla, nga tulla te çimentoja, nga çimentoja te pemët dhe nga pemët te pensionet, pensionistët dëgjonin me qetësi një teori sipas së cilës çdo vilë luksoze e ndërtuar në Zvërnec është potencialisht një shtesë në pension.
Sipas këtij versioni të ekonomisë, resorti nuk ndërtohet për turistët e pasur, por për pensionistët. Milionat nuk shkojnë te investitori, por bëjnë një xhiro patriotike nëpër ekonomi dhe përfundojnë në xhepin e gjyshërve. Dhe kush guxon të ketë ndonjë dyshim për këtë ekuacion të mrekullueshëm financiar, merr përgjigjen flakë të flakë të profesorit: “Po kush je ti?”
