Njëzet e dy liderë të Bashkimit Evropian i kanë dërguar një letër Presidentes së Komisionit Evropian, Ursula von der Leyen, ku shprehin shqetësimin për krizën e emigracionit në Ceuta dhe kritikojnë politikën migratore të Spanjës. Sipas Politico, mes nënshkruesve janë kancelari gjerman Friedrich Merz, kryeministrja italiane Giorgia Meloni dhe liderët e 20 vendeve të tjera anëtare.
Në letër, ata kërkojnë një politikë më të ashpër ndaj emigracionit të paligjshëm, pas hyrjes së mijëra emigrantëve nga Maroku në enklavën spanjolle të Ceutës. Ata kritikojnë gjithashtu planin e qeverisë spanjolle për legalizimin e deri në 1.2 milionë emigrantëve pa dokumente, duke argumentuar se masa të tilla nxisin flukse të reja migratore. Liderët bëjnë thirrje për forcimin e kufijve të jashtëm të BE-së, koordinim më të madh mes vendeve anëtare dhe mbështesin mundësinë e rikthimit të kontrolleve të përkohshme brenda zonës Shengen.
Kryeministri spanjoll Pedro Sánchez reagoi me një letër drejtuar institucioneve evropiane, duke akuzuar disa liderë për sulme politike ndaj Spanjës dhe duke kundërshtuar idenë e pezullimit të vendit nga zona Shengen. Sánchez e cilësoi këtë propozim si të papajtueshëm me ligjin evropian, parimet e solidaritetit dhe interesat afatgjata të Bashkimit Evropian.
