Ariana Grande ka ngritur një padi ndaj dy hakerëve të paidentifikuar, duke i akuzuar se kanë hyrë në mënyrë të paligjshme në llogaritë private të producentëve dhe fotografëve me të cilët ajo ka bashkëpunuar ndër vite.
Sipas dokumenteve gjyqësore të siguruara nga Page Six, dy personat, të identifikuar për momentin si John Doe, dyshohet se kanë hakuar disa llogari personale digjitale, duke përfituar materiale private të artistes.
Në padi thuhet se hakerët kanë siguruar këngë të papublikuara, regjistrime audio, video dhe fotografi të Ariana Grandes, të cilat nuk ishin destinuar për publikun. Ekipi ligjor i këngëtares e cilëson këtë si një shkelje të rëndë të privatësisë dhe një vjedhje të paligjshme të veprës së saj krijuese.
Sipas dokumenteve, materialet e vjedhura dyshohet se janë shitur në “dark web” për shuma të konsiderueshme parash.
Padia pretendon se vetëm gjatë vitit 2023 janë hakuar, vjedhur dhe publikuar në internet 45 këngë të papublikuara të Ariana Grandes.
Gjithashtu, thuhet se që prej debutimit të saj në muzikë në vitin 2011, qindra materiale të tjera të artistes janë nxjerrë në mënyrë të paligjshme.
Sipas dokumenteve, rasti më i fundit i dyshuar i hakerimit ka ndodhur në vitin 2024.
Përmes kësaj padie, Ariana Grande synon gjithashtu të zbulojë identitetin e personave përgjegjës. Një burim pranë këngëtares deklaroi për People se qëllimi i procesit gjyqësor është të shërbejë si një paralajmërim për raste të ngjashme në të ardhmen.
“Padia synon jo vetëm të mbrojë Arianën, por edhe artistët e tjerë që janë përballur me shkelje të privatësisë dhe vjedhje të punës së tyre krijuese. Artistët duhet të kenë të drejtën të vendosin vetë se si dhe kur do ta ndajnë artin e tyre me publikun. Vjedhja dhe shpërndarja e paligjshme e veprave artistike cenon këtë të drejtë dhe nuk duhet të tolerohet,” tha burimi.
Ndërkohë, përfaqësuesit e Ariana Grandes nuk kanë komentuar ende publikisht mbi çështjen.
Këngëtarja 33-vjeçare ndodhet aktualisht në turneun promovues të albumit të saj të shtatë, “Eternal Sunshine”, i cili nisi më 6 qershor në Oakland, Kaliforni. Turneu përfshin koncerte në SHBA, Kanada dhe Londër, ndërsa do të përmbyllet më 1 shtator në O2 Arena në Londër.
