Aktivistët e liruar nga paraburgimi izraelit pasi u ndaluan në një flotilje që përpiqej të çonte ndihma në Gaza iu nënshtruan abuzimeve. Organizatorët thonë se disa janë shtruar në spital me lëndime dhe të paktën 15 prej tyre raportuan sulme seksuale, përfshirë edhe përdhunimin.
Shërbimi i burgjeve të Izraelit i mohoi akuzat. Reuters shkroi se nuk ishte në gjendje t'i verifikonte ato në mënyrë të pavarur.
Gjermania tha se disa nga shtetasit e saj ishin plagosur dhe se disa akuza ishin "serioze". Një burim ligjor në Itali tha se prokurorët atje po hetonin krime të mundshme, duke përfshirë rrëmbimin dhe sulmin seksual.
“Akuzat e ngritura janë të rreme dhe tërësisht pa bazë faktike. Të gjithë të burgosurit dhe të paraburgosurit mbahen në përputhje me ligjin, duke respektuar plotësisht të drejtat e tyre themelore dhe nën mbikëqyrjen e stafit profesional dhe të trajnuar të burgjeve" – deklaroi një zëdhënës i shërbimit të burgjeve izraelite.
Forcat izraelite arrestuan 430 persona në bordin e 50 anijeve në ujërat ndërkombëtare për të ndaluar flotiljen e vullnetarëve që përpiqeshin të çonin furnizime me ndihma në Rripin e Gazës.
Akuzat për abuzim do të shtojnë presionin mbi autoritetet izraelite për të shpjeguar trajtimin e të ndaluarve, pasi pamjet e ministrit izraelit të sigurisë duke tallur disa nga aktivistët në burg shkaktuan një protestë ndërkombëtare.
Italia tha se anëtarët e BE-së po diskutonin vendosjen e sanksioneve ndaj ministrit, Itamar Ben-Gvir.
"Të paktën 15 raste sulmesh seksuale, përfshirë përdhunimin", - shkruan organizatorët e Flotiljes Global Sumud në aplikacionin e mediave sociale Telegram.
"Të qëlluar me plumba gome nga afër. Dhjetëra kocka njerëzish u thyen. Ndërsa sytë e botës janë të përqendruar te vuajtjet e pjesëmarrësve tanë, nuk mund ta theksojmë mjaftueshëm se kjo është thjesht një pamje e brutalitetit që Izraeli imponon çdo ditë mbi pengjet palestinezë” – deklaruan ata.
Luca Poggi, një ekonomist italian midis të ndaluarve nga flotilja, i tha Reuters me mbërritjen e tij në Romë: “Na zhveshën, na hodhën përtokë, na shqelmuan. Shumë prej nesh u goditën me taser, disa u sulmuan seksualisht dhe disave iu mohua qasja në një avokat.”
Prokurorët në Romë po hetonin krimet e mundshme të rrëmbimit, torturës dhe sulmit seksual dhe do të dëgjonin dëshmi nga aktivistët që ishin kthyer në Itali, tha burimi ligjor italian. ©LAPSI.al
