Kryeministri Edi Rama ka takuar banorët e Zvërnecit për t'iu shpjeguar se tokën e tyre, trashëgimi të të parëve nuk mund ta marrin dot më, sepse dikush tjetër ua ka shitur.Madje edhe sikur gjykata t'u japë të drejtë, Rama ua bëri të qartë se në vend të pronës, secili prej tyre mund të marrë paratë, sipas një marrëveshjeje të negociuar më parë nga Artur Shehu me investitorët sirianë, që ishte 68 euro për metër katrorë.
"Nëse gjykata u jep të drejtë, paratë që janë të ngrira nuk i shkojnë atij që s'i takon, por i jepen, i konfiskohen dhe shteti i thotë pronarit "Toka jote u shit kaq, urdhëro lekët"- u shpjegoi Rama banorëve të Zvërnecit.
Përballë këtij realiteti dhe të mbetur pa një zgjedhje për pronën në fjalë, banorët e Zvërnecit nuk kanë pasur shumë për të thënë. Disa qindra miliona euro tashmë mbeten në varësi të hetimeve të SPAK dhe vendimeve të gjykatave.
Por njëri prej tyre, në bisedë me Edi Ramën ngriti pikëpyetje se përse prokurorët specialë i nisën tani hetimet për vjedhjen e pronave, ndërkohë që vetë banorët kishin bërë kallëzime rreth një vit më parë.
"Kam bërë që vjet kallëzim penal në SPAK për këto hajdutët dhe prap, SPAK dje u kujtua" tha një prej banorëve.
Ndërkohë një tjetër banor i Zvërnecit, vuri në dyshim edhe veprimet e investitorëve sirianë, se si erdhën dhe paguan qindra miliona euro për një pronë që ishte ende nën procese gjyqësore.
"Unë kur blej një shtëpi, shkoj e shikoj nëse janë paguar dritat. Tani ai si e bleu? Tani të paguajë!" u shpreh një prej banorëve.
Në takim foli më shumë Edi Rama se sa vetë banorët e Zvërnecit. Kryeministri shoqërohej nga kryebashkiakja e Vlorës, Brunilda Mersini.
