Prokuroria e Tiranë ka marrë në pyetje pesë të mitur në lidhje me zjarrin e rënë në një kompleks pallatesh pranë zonës së njohur si “Farmacia 10”.
Sipas hetimeve paraprake, fëmijët dyshohet se kanë hedhur mbeturina në një karrocë, e cila konsiderohet si pika fillestare e zjarrit. Flakët më pas janë përhapur, duke përfshirë ndërtesën shumëkatëshe. Të miturit, banorë të zonës, janë pyetur në prani të prindërve dhe psikologëve, duke deklaruar se veprimi nuk ka qenë i qëllimshëm.
Ndërkohë, prokurori i çështjes ka kërkuar hetime të mëtejshme në vendngjarje dhe marrjen në pyetje të personave të tjerë. Ende nuk ka përfunduar ekspertiza shkencore për shkaqet e plota të zjarrit.
Nga ana tjetër, katër persona: Razie Sula, Agron Cara, Enver Ademi dhe Altin Furtuna, janë proceduar për shkelje të rregullave të mbrojtjes nga zjarri. Gjykata ka vendosur ndaj tyre masën “detyrim paraqitje”.
