Sot mbahet seanca e radhës e gjyqit në themel për Erion Veliajn në GJKKO. Avokati i tij, ish-deputeti i PS Plarent Ndreca është paraqitur në gjykatë. Veliaj ndodhet në paraburgim që prej shkurtit të vitit të kaluar. Seanca e fundit gjyqësore ndaj tij u zhvillua më 3 prill, ku treshja gjykuese i dha 2 javë kohë avokatit Ndreca të njihet me dosjen hetimore.
Në seancën e shkuar, biznesmeni Elman Abule, Mirton Lika e ish-deputetja socialiste Klotilda Bushka kërkuan ndarjen e çështjes dhe gjykimin nga një gjykatë tjetër, jo nga GJKKO. Avokati i Bushkës pretendoi se çështja duhet të shqyrtohet nga një gjykatë tjetër për shkak se ajo nuk është më deputete.
Krahas Veliajt dhe bashkëshortes së tij, Ajola Xoxa, të pandehur janë marrë për këtë dosje edhe 28 persona dhe shoqëri të tjera. Ndaj tij janë ngritur akuzat për korrupsion pasiv në 9 raste, pastrim parash, mosdeklarim pasurie, shpërdorim detyre dhe futja e sendeve në burg.
